Ukiuni 20-ni aggersuni innuttaasut ataatsimut amerlassutsimikkut ilimanarpoq ikiliartornissaat maanna 56.370-niit 2020-mi 56.000-nut, 2030-milu 55.000-nut. 2040-mi Kalaallit Nunaanni ullumikkumiit 2.500-nik ikinnerusut najugaqassapput, kinguaassiorsinnaanikkut toqusarnertigut, nunasinerit nuuttarnerillu tungaasigut ilimaginngisamik allanngortoqariataanngippat. Innuttaasut agguaqatigiissillugu ukiui ullumikkut 34,7-iusoq 37,9-mut qaffassaaq. Taamalilluni Kalaallit Nunaanni innuttaasut Danmarkimi innuttaasunut assersuutitut naleqqiullugit ukiukinnerussapput, tassa Danmarkimi innuttaasut agguaqatigiissillugu maanna ukiui 40-iummata.
Takussutissiaq 1. 1983-miit 2040-mut innuttaasut utoqqaassusinut immikkoortitat amerlassusaat, ukiuni nalunaakkani
Malugiuk. Kisitsisaasivimmik kisitsisit takukkit (http://bank.stat.gl/benp2013 )
Naatsorsuiffimmi inuuttaasuni utoqqalisut (70+) qanoq amerlatiginissaannik naatsorsuinerup takutippaa pineqartut marloriaatinngorsimanissaat, 2040-milu maanna innuttaasuni 0-6-nik ukioqartut amerlassusaat angu-simassallugit. Innuttaasuni suliffeqarsinnaasutut ukioqassutsimikkut inissisimasut ikinnerulissapput, kisianni innuttaasut amerlassusaasa affaattut amerlassuseqassallutik.
Innuttaasut qanoq amerlatiginissaannik naatsorsuinikkut angusat pingaarnerit, Kalaallit Nunaanni Naatsorsueqqissaartarfiup 2040-ip tungaanut nunatsinni innuttaasut pillugit naatsorsugai, taama isikkoqarput, 1. januar 2013-mi innuttaasunut naatsorsuutit naammassisat tunngavigalugit.
Suiaassusermut, ukiumik ataatsimik utoqqaassusilinnut inunngorfiinullu naatsorsuutit sukumiisumik inerneri Kisitsisaataasivitsinni http://bank.stat.gl/benp2013 qimerloorneqarsinnaapput.